Da time everyting had start, had one Guy. “God’s Talk,” dass who him. Dat Guy and God, dey stay togedda, and da Guy stay God fo real kine. Dass da Guy, da time everyting had start, him an God stay togedda. God wen make everyting, but da way he do um, he tell dis Guy fo do um. No mo notting dis Guy neva make. He da Guy, if you like come alive fo real kine, you come by him, cuz dat kine life come from him. Wen peopo come alive lidat, jalike day stay inside one place dat get plenny light. Den dey can see an undastan. No matta stay dark, da dark no can pio da light. Everytime get light. (John 1:1-5)
Da Jesus Book. [New Testament in Hawaii Pidgin.] Orlando: Wycliffe Bible Translators, 2000.